Kei rogonys ar pīstom braukuojuš
Stuostiaja muns tās. Jam persuoneigi stuostiejs Bierņu Juoņa i Ontona tāvs Jezups (Krystiņku dzeraunis).
Jezupu panam službā i aizdzan iz Kijevu. Tymūs laikūs soldotus rozdavuš pa dzerauņam. Jam dakrits pi vīnys viaceitis dzeivuot. Jei beijsia brīsmeigi loba. Jū apkolpojūtia i pītaisūtia iedīņu, pīcapūtia blīnu. Jei da pušdiņu dzeivuosia pa sātu a nu pušdiņu nazyn kur aizguosia. Kur jei staiguoja, tuo jis nazynuoja, par tū ka jam jau reitā da juos izīšonys vādziejs izīt.
Riaizi naskei bejsia jam breivuoka dīna. Jis paieds blīnu i atsagulstās. Saimneica tuo napamona, jei dumoj, ka jis jau aizguojs. Jei apstruoduosia reita dorbus, panam nu plaukteņa naskeidys zuolis, pamuozoj skourodu, izasāstās patia viersā... kloudzīs vīn, ka jei ar vusu skourodu izbrauc pa trūbu uorā. Skouroda atkreit atpakaļ, a rogona aizbrauc. Jis, nikuo daudz nadūmuodams, nūsprīž izasiāstīs iz skourodys. Jam gribīs zynot, voi jū variās paciaļt voi nā. Drūšeibys piec, lai nanūskrītu, pīsin siavi pi lylys ūzula pīstys. Kei tik jis pamozoj skourodu da izkuop viersā, … bryukšīs vīn, ka ar vusu pīstu jū iznas pa trūbu iz augšu. Jis teik lylā domā. Tī pylns ļaužu, tai kei sistiņ pīsyss. Jis apmulst i nazyna, kū vaira dariāt, kei atpakaļ tikt. A kur ta viāļ bailis: cyts puorzataiss par cyuku, cyts par uozi, cyts par suni, cyts par ciušku... "Kur ta tu tia tics?" prosa daguosia saimineica pi jus. "Lyudzama tu mani daboj nu šians pa celu! As, nikuo ļauna nadūmuodams, kei izdarieju tai kei tu, tyku tia." Tei panam izvad jū uorā... bryukšīs vīn, jis ar vusu pīstu otkon ustobā. Vokorā atguosia viaciņa. Jei smejūtiās par juo nalaimi. Tei dzie asūt šūs škola. Tī šuos vuicūtīs sovā muokslā. Tī vuicūt apragaņāt, kei atragaņāt, kei vuškys cierpt u.t.t. Šuos pazeistūt ari myusu pusi. Asūt na vīnu vīn riaizi par vuornom Obrumānu (Makašānu pag.) bārzūs siediejuš.
